News

16. Februar 2007

Schiiweekend 2007 in Davos

Endlich nach langem hin und her schaffts de Bricht vom Schiiweekend z Davos au mal no is Internet... ;)

No mit total müäde Äugli, verschlafne Gsichter und volle Rucksäck hend mir üs am Samschtigmorge z Rüti troffe und sind gmeinsam uf Davos ufegfahre. Womer endli mal chli wacher worde sind, hetts au scho de erschti Halt geh und mir sind gmüätlich go Zmorge ässä zum no ganz wach zwerde. Det sind au alli Reschtliche no zu üs gstosse, wo nid vo Rüti us cho sind.

Am halbi zähni simmer denn endlich in Davos iitroffe. Als erschts hemmer denn üses Gepäck abgeh und sind grad uf d Pischte. Naja... soovill Schnee häts würklich nid gha. Aber me hett immerhin chönä fahre. Wemme halt ab und zue de Stei hett müässä uswiiche. Am Morge isch au no uh iisig gsi. Aber wenigschtens hemmer au super schöns Wätter gha. Am Mittag hemmer bi feinem Ässe nochli s Wätter gnosse, bevors denn wider uf d Pischte gange isch. Im Gegesatz zum Morge isches de au scho rächt ‚sulzig’ gsi.

Gege di vieri hend de au so zimmli alli gnueg gha und s isch ad Zimmerufteilig gange. Mit Heisshunger hemmer üs de au im Restaurant troffe, zum was ässä. De Salat isch meega fein gsi. Und s Hüähnli? Glaub da sind d Meinige usenand gange ;).

Am spötere Abig hends wohl so zimmli alli bevorzugt, s eifach echli gmüätlich zneh. Villi hend Spiele gmacht oder süscht sich echli underhalte. Zum Ziit umetriibe, bis endli de Zuber eröffnet worde isch.

Es isch echt genial gsi drinne. Warms Wasser, usse am Zuber Schnee, en wunderschöne Sternehimmel… und nöd vergässä, s "Füässle" mit jedem. Isch ganz schön eng gsi mit sovill Lüüt; aber au luschtig. Leider hett üs de Typ wo s Wasser nahfüll vergässä, bises de immer chüähler worde isch, und immer meh gange sind. Isch ja doch au langsam Ziit worde, wemer am Morge früäh wider uf d Pischte hett welle.

Am nöchschte Morge sind di eine de doch scho relativ früäh wach gsi. (ha au nüm chönä schlafe, wo d Gondle aastellt worde isch). Nacheme usgibige Zmorge hemmer üs de nomol ufgmacht, zum de Tag uf de Pischte zgnüsse. Leider hetts no sonen Zwüschefall geh, wo de di eine zerscht hend müässä vor de Tüür warte, bis si sich au endli hend chönä startklar mache für s Fahre *g* (Details werdet etz us Dateschutz nid erwähnt) :P.

Zuegeh, am Sunntig sind d Pischteverhältnis doch vill besser gsi weder am Samschtig. Voll Freud hend mir also nomol en Tag uf de Pischte mit herrlichem Wätter gnosse. Gege de Mittag hii hemmer üs de all wider troffe und sind gmeinsam go Ässe. Tja, und wenns nid scho alli wüssed: bstelled niä en Tomatesalat mit Mozzerella innere Schiihütte obe. Will de chamer am wohl am längschte uf s Ässe warte. (d Tomate müänd ja wohl zerscht riif werde :P)

Womer de eich nomol echli hend welle go fahre, isch leider vom Tal her Näbel ufecho und mir hend üs de grad entschide, zude Mittelstation zfahre.

Und nacheme erläbnisriise Weekend hend mir üs (scho wider?) müäd uf de Wäg gmacht.

Aber das Weekend werdemer soo schnäll glaub nüm vergässä…

Es riisigs Danke ad Baba und an Mäke, wo das alles organisiert hend. Äs isch echt mega gsi!